Вьетнам улсын Нийгмийн хамгааллын салбарын найман хүний бүрэлдэхүүнтэй төлөөлөгчид манай улсад 2015 оны 07 дугаар сарын 06-наас 07 дугаар сарын 09-ний хооронд дөрөв хоногийн хугацаатай ажил хэргийн айлчлал хийж байна. Энэ хүрээнд Монгол улсын Засгийн газрын хэрэгжүүлэгч агентлаг Нийгмийн  даатгалын ерөнхий газарт зочилон манай байгуулагын үйл ажиллагаатай танилцав. Хоёр улс тус салбарт уламжлалт хамтын ажиллагаатай ба 2008 онд хамтран ажиллах санамж бичгийг үзэглэсэн билээ. Мөн тус улсын Нийгмийн даатгалын байгууллагын даргатай БНСУ-ын Сөүл хотод албан уулзалт зохион байгуулж байгууллага хоорондын хамтын ажиллагааг сэргээн, шинэ шатанд хүргэх талаар харилцан санал солилцсон байдаг. Энэхүү хамтын ажиллагааны хүрээнд хийгдэж буй ээлжит ажил нь энэ удаагийн албан айлчлал болж байна.

 

Вьетнам улсын төлөөлөгчид Монгол улсын нийгмийн хамгааллын тогтолцоо, нийгмийн даатгал, эрүүл мэндийн даатгал, эрүүл мэндийн салбарын хөгжлийн чиглэлээр туршлага судлах зорилготой ирсэн ба дээрх асуудлаар холбогдох яам, агентлаг, эрүүл мэндийн байгууллагууд дээр очиж танилцан, албан уулзалт хийж, хэрэгцээт мэдээллээ авсан байна.